(1904) A Mercedes G. de valle
Rellambiduca,
Coloradina,
Patagüeyera,
Pirinolina
¿Quiés que te faiga
Un versiquín?
¡Valiente cosa
Y' esu pa mín!
Non apondero
La to guapura,
Pa que non digas
Que ye tochura;
Pos lo más bono,
L'alma, mio ne,
Ye 'n ti más guapo
Que non sé qué.
Ser güena moza,
Bien fecha, nidia,
Dar á la nieve
Rabies d'invidia,
Tener la boca
Como'l coral,
En resumides
Cuentes, ¿qué val?
El quiz y el cuentu,
Si vien á mano,
Ye, igual d'ivierno
Que de verano,
Tener de gracia
Un almacén,
Y co la xente
Lleváse bien.
De vete gorda
Non te arredimes
Que á d'ellos gústenyos
Reforzadines,
Y si apuramos
Esta custión,
Más que l'anguila
Val el salmón.
Non pìerdes fiesta
De les monxines
Nin las junciones
Con fervorines,
Y si se tercia
Q'hay que alternar,
Cantes y blinques
A fartucar.
Vas á sermones,
Vas á novenes,
Cuerres pa'l Cristo
De les Cadenes,
Todo gufando
De pura fé,
¡Y eso chachina,
Que bonu ye...!
Reza, neñona,
Reza p' alantre,
Que al que non reza
Llévalo'l diantre.
Ampara'l probe;
Dios quierlo más
Que non tar fierve
Que ferverás.
Y tú, fiína,
Yes tan hablante,
Tan amorosa
Y tan carpante,
Que'l que té triste
Ó té alteriao,
Cuantes que i fales
Cuentu acabao.
Cuando tú allegues
Tan redondina,
Co los colores
De cerecina,
Y á daquien dices
Que cómo i vá,
Si vieres, neña,
Que gusto dá...!
Pos non yes miga
Cumplimentera,
Nin yes gañina
Nin papelera;
Yes puramente
Lo natural,
Y al pan... eicetra
Y al vino... igual.
Yes más tovía,
Yes munchu aguda,
Con enseñancia
Morrocotuda;
Pero en tapalo
Yes tan atroz,
Que mal apenas
Se te i conoz.
Sabes debujo,
Dir d'á caballo,
Tocá la música,
Char el tresmallo;
Fales franxute,
Fales n' inglés,
Y non deprendes
Lo que non quiés.
En fin, rapaza,
Ya dixe abondo,
Y pa que veas
Que acorrespondo,
Pa despedida
Com' un relós,
Joasús t' ampare
Santa de Dios.